شن إبراهيم سعيد لاعب النادي الأهلي ومنتخب مصر السابق هجومًا ناريًا على النجم محمد صلاح لاعب منتخبنا الوطني وفريق ليفربول الإنجليزي، وأكد أن قائد الفراعنة يقوم بحملة ضده.
وقال إبراهيم سعيد عبر برنامجه المذاع على شاشة قناة “النهار”: “محمد صلاح بيلعب معايا لعبة، وأنا بحب المباريات، ودي لعبتي، وفي مواقف كتير بتأكد أنه شاغل دماغه بيا، وهو لو حطني في دماغه ممكن ده يبعده شوية”.
ووجه إبراهيم سعيد ححديثه لمحمد صلاح، قائلًا: “الرزق ده بتاع ربنا، الحاجات اللي بتحصل دي عيب، واللي بتعمله بيوصلني، لما اتكلمت عليك اتكلمت في مواقف مع منتخب مصر ماتكلمتش على محمد صلاح لاعب ليفربول”.
وأضاف إبراهيم سعيد: “الأساليب اللي بتحصل معايا مش كرة، بس مش مشكلة أنا معاك وحاول مرة تانية وتالتة ورابعة، وممكن تكسب وممكن تخسر، بس انا بحب اتعامل في الحاجات دي بطريقة أفضل”.
وأكمل لاعب منتخب مصر السابق: “أكتر واحد وقف معاك هو إبراهيم سعيد، وانت عارف ومتأكد لأن مفيش حاجة بتفوتها وبتتابع كل حاجة، وسيبك من كلام مش بتابع، انت بتتابع كل حاجة”.
وواصل مدافع الأهلي الأسبق: “انت مستغرب أن إبراهيم سعيد بينتقدك، اه بنتقدك، انا كابتنك، وموضوع أنك تلعب اللعب ده مش حلوة لأنك مش فوق النقد، ومن مصلحة الكرة المصرية انك تتعرض للنقد”.
وأردف: “انت مفرحتش الشعب المصري، وانا نفسي اشوفك رافع كأس أمم إفريقيا، زي ما بتتصور بالحذاء والدروع مع ليفربول، لأن ده إنجاز شخصي ليك مع منتخب مصر”.
ووأكمل: “احنا بنتكلم معاك هنا عشان منتخب مصر، وانا عارف أن انت ممكن يكون معندكش الأحساس بتاع منتخب مصر عشان مش مركز مع المنتخب، ومش عايز حد ينتقدك”.
وأتم: “نفسي أشوف محمد صلاح بتاع زمان، المتواضع اللي كان بيبقى ماسك المصحف في أيده، وسيبك من الكتب والحاجات اللي بتنزلها دي مابتأكلش عيش، عايز أشوف محمد صلاح اللي بيقدر كل الناس”.